ذكرتك ليلة البارح

ذكرتك ليلة البارح سهرت ولا عرفت النـوم
طرى إسمك على بالي وطار النوم من عينـي

ثلاث سنين يالغالي تغيـب ولا تجينـي يـوم
وأنا اللي غيبتك عني ثـلاث أيـام تشقينـي

تركتيني مثل شخصٍ غريقٍ ما يجيـد العـوم
تلاعب بي جيوش الموج مدري وين ترميني

أخاوي الليل بغيابك حزيـنٍ شاقـيٍ مهمـوم
أعاني لوعتي وحدي ولا بـه مـن يواسينـي

يعيش الناس في قربك ومن وصلك أنا محروم
حنيني يشعل بصدري ونار الشوق صالينـي

كثير الناس لاموني وزادونـي ألـم وهمـوم
وقالوا لي خلاص أنسى تراك أصبحت ناسيني

أنا وش لون لي أنسى وحبك داخلي مرسـوم
وطيفك لو يمر لحظة مـع النسمـة يبكينـي

أنا بصبر على بعدك مدام إن القـدر محتـوم
ولكن يا بعد عمـري حـرام إنـك تجافينـي

تمر سنين من عمري وجسر وصالنا مهـدوم
وأنا مقدر على الفرقى وصعب إنك تناسينـي

ولا ندري من الظالم ولا ندري من المظلـوم
ولكن ندري بكلمـة أراضيـك وتراضينـي

متى يصفى معك جوي متى تترك سمانا غيوم
متى تسعد بك عيوني متى تنور بـك سنينـي

متى تتركني أحزاني متى حظي معاك يقـوم
متى يفرح مثل هالناس قلـي يانظرعينـي